Аԥсны Аҳәынҭқарра адәныҟатәи аусқәа Рминистрра имариамыз ашьақәгылара амҩа ианысит. Аԥсны адәныҟаролитикатә Хылаԥшырҭа анапхгаҩцәеи аусзуҩцәеи рыжәлар  ирывагыланы атәыла ахьыԥшымра иазықәԥон, аполитикатә ԥынгыларақәеи аинформациатә блокадеи ириааины иуадаҩу аиҿцәажәарақәа рхы аладырхәон, жәларбжьаратәи арена аҿы Аԥсны аҳәынҭқарра аинтересқәа рыдгалара мҩаԥыргон. ***

Аԥсны Аҳәынҭқарра Адәныҟатәи аусқәа рминистр Инал Арӡынба лаҵарамза 17 аҽны Аԥсны Аҳәынҭқарра Адәныҟатәи аусқәа рминистрра аколлектив 29 шықәса ахыҵра рыдиныҳәалеит.

«Аԥсны Аҳәынҭқарра Адәныҟатәи аусқәа рминистрра лаҵарамза 17 аҽны 29 шықәса ахыҵит.

Аԥсуа дипломатиа иуадаҩыз насгьы акырӡа зҵазкуаз амҩа ианысит. Аԥсны Аџьынџьтәылатә Еибашьра анцоз 1992-1993 шықәсқәа раан Аминистрра аԥҵара иазкыз Ақәҵара инапы аҵаиҩит Аԥсны Раԥхьатәи Ахада Владислав Арӡынба лаҵарамза 17, 1993 шықәсазы. Ҳреспублика адипломатиатә школ шьақәгылон аибашьреи уи нахыстәи аамҭа уадаҩи рҭагылазаашьаҿы.

Арҭ ашықәсқәа рзы ҳминистрра ҳтәыла аинтересқәа зыхьчоуи уи адәныҟаполитикатә хырхарҭа еиҿызкаауеи профессионалтә командахеит.

Ҳаԥсадгьыл жәларбжьаратәи азхаҵара, иара убас ҳшәарҭадара аиқәыршәаразы ихымԥадатәу аҭагылазаашьақәа раԥҵара – ҳхықәкы хадақәа иреиуоуп. Агәра ганы сыҟоуп, ҳамчеилаҵа абзоурала ҳхықәкқәа рынагӡара шҳалшо.