Аҟәа. Лаҵарамза 17, 2022 шықәса. Аԥсныпресс. Акциа «Аҵх амузеи аҿы» амҩаԥгара иазкын Аԥснытәи аҳәынҭқарратә музеи аҿы имҩаԥгаз апресс-конференциа. Акциа мҩаԥгахоит лаҵарамза 18 – 19 ауха аҳҭнықалақь амузеиқәа рҿы.
Аҳәынҭқарратә музеи адиректор Аркади Џьопуа, Д. И. Гәлиа ихьӡ зху Аҩны-амузеи адиректор Светлана Қорсаиа, В. Г. Арӡынба ихьӡ зху Аҳәынҭқарратә арратә Ахьӡ-Аԥша амузеи адиректор Мзиа Беииа, Аԥсны акультура Аминистрра акультуреи аҟазареи рыҟәша аиҳабы инапынҵақәа назыгӡо Авҭандил Конџьариа, иара убас ари аҟәша аспециалист хада Мрана Дбар иарбоу акциа шымҩаԥысло азы адырра ҟарҵеит.
Аркади Џьопуа иажәақәа рыла, акциа «Аҵх амузеи аҿы» раԥхьаӡа акәны имҩаԥган 2015 шықәсазы Аҳәынҭқарратә музеи аҿы. «Ари амш аҽны амузеи аҭааҩцәа аекспозициатә залқәа рҿы лассы-лассы иқәдмыргыло аекспонатқәа рбара азы алшара роуеит», - ҳәа адырра ҟаиҵеит Аркади Џьопуа.
Дырмит Гәлиа ихьӡ зху Аҩны –амузеи адиректор Светлана Қорсаиаԥҳа ари акциа ахықәкы хада -излауа ала ирацәаны аҭааҩцәа радыԥхьалареи ашколхәыҷқәеи астудентцәеи аԥсуа культуреи алитературеи аинтерес дыркра ауп ҳәа инаҵшьны иазгәалҭеит.
