Аҟәа. Мшаԥымза 28, 2022 шықәса. Аԥсныпресс. Ԥхынгәымза 28, 2009 шықәсазы иаԥҵаз «Аԥсны Аҳәынҭқарреи Краснодартәи атәылаҿацә Ахадареи рыбжьара ахәаахәҭра-економикатә, анаука-техникатә, агуманитартәи акультуратәи усеицура азы Аиқәшаҳаҭра» анагӡара азы 2022-2024 шш. аусмҩаԥгатәқәа рыпрограмма рыдыркылеит мшаԥымза 28 азы имҩаԥысыз аминистрцәа Реилазаара аилатәара аҿы.
Апрограмма иалалеит еиуеиԥшым ахырхарҭақәа: адәныҟаекономикатә усура, атуризм, акультура, аекологиа, уҳәа рыла аҩганк ақәыршаҳаҭны иалкаахаз 10 инареиҳаны аусмҩаԥгатәқәа.
Апрограмма иазԥхьагәанаҭоит Аҟәа ақалақь аҿы Краснодартәи атәылаҿацә акультура-усуратә центр аартра. Ацентр аартра азы ажәалагала ареспублика адәныҟатәи аусқәа Рминистрра ахь инашьҭуп.
