Аҟәа. Хәажәкырамза 11, 2022 шықәса. Аԥсныпресс. Хәажәкырамза 12 рзы Аԥсны имҩаԥысраны иҟоуп Жәлар Реизара-Апарламент ахь алхрақәа.  35 адепутаттә ҭыԥқәа рахь иқәгылоуп 123-ҩык акандидатцәа.

Иахьа аусура иалагеит Алхратә Комиссиа Хада апресс-центр.

Алхратә Комиссиа Хада ахантәаҩы Дмитри Маршьан апресс-конференциа аҿы дықәгылауа 35 адепутаттә ҭыԥқәа рахь иқәгылоуп 123-ҩык акандидатцәа, иара убас  35 округи 152 алхратә ҭыԥхадақәеи рҿы алхрақәа рымҩаԥгаразы зегьы рхиоуп ҳәа адырра ҟаиҵеит.

«Алхыҩцәа акоронавирустә ҿкы чымазара рацәыхьчара азы асанитартә уснагӡатәқәа зегьы мҩаԥгахоит. Ҳара агәабзиарахьчара Аминистрра абжьгарақәа зегьы наҳагӡоит, аокругтәи аҭыԥхадатәи акомиссиақәа рхантәаҩцәа зегьы хазхаҭалтәи ахыхьчаратә хархәагақәа рыла еиқәҳаршәоит», - ҳәа иҳәеит Дмитри Маршьан.

Уи иҟаиҵаз адыррақәа рыла, аокругқәа хԥа рҿы алхрақәа альтернативада имҩаԥысуеит, араҟа акандидатцәа аӡәаӡәала ауп ишықәгылоу.  Аокругқәа 9 рҿы ҩыџьа-ҩыџьа акандидатцәа ықәгылоуп, зегьы реиҳа акандидатцәа ахьықәгылоу аокруг № 7 аҿы ауп – жәҩык акандидатцәа.   

Аԥсны «аҭынчра амш» ҳәа иҟаӡам, убри аҟнытә Аԥсуа телехәаԥшра аефир ала иахьа имҩаԥысуеит аокруг №7 аҟынтәи адепутатрахь акандидатцәа рыбжьара аҵыхәтәантәи ателедебатқәа.

Арахь иааны иҟоуп 25-ҩык жәларбжьаратәи анаԥшыҩцәа. Уи Урыстәылатәи Афедерациа Алхратә Комиссиа Хада ахаҭарнакцәа, иара убас Аҳәынҭқарратә Дума, Приднестровтәи Молдавтәи Ареспублика, Аахыҵ Уаԥстәыла,  Лугансктәи Жәлартә Республика, Урыстәылатәи Афедерациа Ауаажәларратә Палата,  Урыстәылеи Белоруссиеи Реидгылара Апарламенттә Еизара ахаҭарнакцәа.

Аԥсны Алхратә Комиссиа Хада ахантәаҩы ажурналистцәа рызҵаарақәа жәпакы аҭак ҟаиҵеит. АКХ ахантәаҩы иара убас ашәҟәы иҭагалаз  123-ҩык адепутатрахь акандидатцәа рҟынтәи аӡәыр икандидатура ықәигама ҳәа ажурналистцәа рызҵаара аҭак ҟаҵо иазгәеиҭеит:

«123 – ҩык ашәҟәы иҭагалаз адепутатрахь акандидатцәа рҟынтәи уажәы аӡәгьы икандидатура ықәимгаӡеит. Раԥхьа 124 –ҩык акандидатцәа ашәҟәы иҭагалан, аха аӡәы хатәгәаԥхарала икандидатура ықәигеит», - ҳәа иҳәеит Дмитри Маршьан.