Аҟәа. Жәабранмза 9, 2022 шықәса. Аԥсныпресс. Урыстәылатәи Афедерациа иҟоу Аԥсны Аҳәынҭқарра Ацҳаражәҳәарҭа аҿы Аԥсны адәныҟатәи аусқәа рминистр Инал Арӡынбеи Еиду Амилаҭқәа Реиҿкаара ассоциациақәа Адунеизегьтәи афедерациа апрезидент ихаҭыԥуаҩ, Еиду Амилаҭқәа Реиҿкаара адгылара аҭаразы Урыстәылатәи ассоциациа ахантәаҩы ихаҭыԥуаҩ Алеқсеи Борисови реиԥылара мҩаԥысит, ҳәа адырра аланарҵәеит Аԥсны адәныҟатәи аусқәа Рминистрра аофициалтә саит.
Инал Арӡынба Алеқсеи Борисов ииҭеит Еиду Амилаҭқәа Реиҿкаара амаӡаныҟәгаҩ хада Антониу Гутерриш ихьӡала Аԥсны адәныҟатәи аусқәа рминистр Аԥсны Аҳәынҭқарра Еиду Амилаҭқәа Реиҿкаара аҿы аҳәынҭқарра-анаԥшҩы ҳәа астатус аҭара азы иҟаиҵаз аҳәамҭа.
Ари астатус Аԥсны Аҳәынҭқарра азы Еиду Амилаҭқәа Реиҿкаара Ассамблеиа Хада адискуссиақәа рылахәхара азы алшара аԥнаҵоит.
Инал Арӡынба инаҵшьны иазгәеиҭеит, Еиду Амилаҭқәа Реиҿкаара Аԥҟаԥҵәа инақәыршәаны, Аиҿкаара ахықәкы хадақәа иреиуоуп идуу еиԥш имаҷу ажәларқәагьы рзинқәа аиҟарара алыршара.
«Ҳара иаҳҭахуп адунеи аҿы ираҳар Аԥсны абжьы. Ҳара ҳхала ҳтәылаҿы имҩаԥысуа атәы ҳҳәаратәы ҳаҟоуп", - ҳәа инаҵшьны иазгәеиҭеит аминистр.
Аганқәа иара убас Алеқсеи Борисови егьырҭ жәларбжьаратәи асасцәеи злахәхо Еиду Амилаҭқәа Реиҿкаара иҭышәынтәалоу аҿиара ахықәкқәа рзы Афорум Аԥсны амҩаԥагара азҵаарагьы иалацәажәеит. Афорум ҳазҭоу ашықәс ааԥынразы амҩаԥгара азԥхьагәаҭоуп.
