Аҟәа. Ажьырнаҳәамза 26, 2021 шықәса. Аԥсныпресс. Ажьырныҳәамза 27 рзы Аҟәа ақалақь аҿы аус зуа абжьаратәи ашколқәа зегьы жәабранмза 4 (ахәаша) акарантин азы иаркхоит. Абри азы Аԥсныпресс акорреспондент диҿцәажәо адырра ҟаиҵеит атәыла аҵареи абызшәатә политикеи рминистр Инал Габлиа.
«Иааизакны уахәаԥшуазар, ареспублика аҿы акоронавирустә ҿкы чымазара ала ичмазаҩуп 83-ҩык арҵаҩцәа. Ишыжәдыруа еиԥш, Гагра араион аҿы ашколқәа русура мчыбжьык аҟынӡа иаанкылоуп. Уаҵәы инаркны Аҟәа ақалақь аҿы аус зуа ашколқәа зегьы акарантин ахь ишьҭхоит», - ҳәа иҳәеит Инал Габлиа.
Уи иажәақәа рыла, егьырҭ араионқәа рҿы акоронавирус иадҳәаланы ишьақәгылаз аҭагылазаашьа макьаназы иҭышәынтәалоуп ҳәа уҳәаратәы иҟоуп.
«Ҳтәыла аҿы акоронавирустә ҿкы чымазара захьуа ахәыҷқәа иааизакны рхыԥхьаӡра 150-ҩык рҟынӡа инаӡоит. Ҳара аҳақьымцәа ҳрыҿцәажәеит, аштамм ҿыц «омикрон» агәҭынчымра ҳазцәырнагоит, избан акәзар, излеилкаахаз ала уи ирласны алаҵәара алшоит», - ҳәа иазгәеиҭеит аминистр.
Инал Габлиа иара убас атәыла асанитартә ҳақьым хада Лиудмила Скорик иҟалҵаз абжьгарақәа рахь азхьарԥш ҟаҵо арҵаҩцәа зегьы алаҵа ҟарҵароуп ҳәа инаҵшьны иазгәеиҭеит.
«Лиудмила Скорик алаҵа ҟазымҵац арҵаҩцәа аусурахь ицәырымҵлароуп ҳәа изныкымкәа иазгәалҭахьан. Урҭ аусура рҭахызар, усҟан хымԥада алаҵа ҟарҵароуп. Ҳара ҳарҵаҩцәа алаҵа ҟарҵарц азы ҩымчыбжь аҟынӡа аамҭа раҳҭоит. Ачымазара алаҽра еизҳауеит, убри аҟнытә алаҵа аҟаҵара ада ԥсыхәа ыҟаӡам», - ҳәа инаҵшьны иазгәеиҭеит Инал Габлиа.
Аҵарадырра Аминистрра есыҽны ареспублика араионқәа зегьы рҿы иҟоу аҭагылазаашьа ахылаԥшра анаҭоит.
«Аҭагылазаашьа еиӷьхар, Аҟәа ахәыҷқәа ашкол ахь ҩаԥхьа аныҟәара иалагоит. Ҿырԥштәыс иаагозар, Ҭҟәарчал араион аҿы арҵаҩцәа рыбжьара ачымазара злаҽу аӡәгьы дыҟам»,-ҳәа иазгәеиҭеит аминистр.
