Аҟәа. Ԥхынҷкәынмза 21, 2021 шықәса. Аҧсныпресс. Иахьа, 00:00 сааҭ инаркны 2021-2022 шш. аӡынтәи аамҭахәҭа азы ишьақәгылаз афымцалашаратә дефицит ахарҭәаара азы Урыстәылантәи Афедерациа аҟынтәи афымцалашара аиагара аҩбатәи аетап амҩаҧгара иалагеит, ҳәа адырра ҟанаҵоит Ареспубликатә Унитартә Наплакы «Амшынеиқәафымцамч» апресс-маҵзура. Уажәтәи аамҭазы, зфымцаеиқәыршәара Егрытәи Аӡфымцатә Станциеи Аӡфымцастанциа-1 аӡхыҽҽи рыла имҩаҧысуа Звольҳараку Афымцацәаҳәа «Шешелети-1», Звольҳараку Афымцацәаҳәа «Шешелети-2» уахь иналамҵакәа, Ареспублика зегьы фымцалашарала аиқәыршәара мҩаҧысуеит Урыстәылатәи Афедерациа аҟынтәи иаауа афымцамч ала.
Аминистрцәа Реилазаара иҟанаҵаз Адҵа ала инацҵаны даҽа трансформаторк ашьақәыргылара иазку аусурақәа мҩаҧысуеит. Уи иабзоураны Аҟәа ақалақь Аҳабла Ҿыц, Ачадара ақыҭа, Алашарбага аҳабла, уҳәа рҿы афымцалашарала аиқәыршәара иадҳәалоу аҭагылазаашьа еиӷьхароуп, насгьы аамҭалатәи алашара арцәарақәа аанкылахоит.
