«Даара иуадаҩуп аамҭак ала арҿиаратә усуреи аредакциа аматериал-техникатә еиқәыршәареи иазку аусуреи реилагӡара. Убри аҟнытә ҳара иарбоу аетап аҿы ҳҳәынҭқарратә редакциақәа зегьы рмазаратә комплекс ааидкыланы уи анапхгараҭара Ареспубликатә ҳәынҭқарратә Усбарҭа «Аҧснымедиа» адҵаразы аӡбамҭа ҳадаҳкылеит. Уи ахықәкы хаданы иҟоу аколлективқәа зегьы рхықәкы хада –арҿиаратә усура еиҳау ахшыҩзышьҭра аҭара нарыгӡарц ауп», - ҳәа иҳәеит иара.
Кристиан Бжьаниа иара убас иажәақәа рыла ҧыҭрак ашьҭахь «Аҧснымедиа» ақалақь агәаны иҟоу ахыбрақәа руак аҿы иҟалоит. Зыӡбахә имоу Аиааира Апроспект аҿы иҟоу ҧыхьатәи аҭелтә станциа ахыбра ауп. Уаҟа макьаназы аиҭашьақәыргыларатә усурақәа мҩаҧгатәуп, иара убас аиқәыршәага ҿыцқәа рыла еиқәыршәатәуп. Иара убас агазеҭқәа рредакциақәеи Аҧсныпресси ирыцны уахь ииагахоит атипографиагьы.
«Макьаназы арҭ азҵаарақәа зегьы рыӡбара алыршахаанӡа шәара уажәы аус ахьыжәуа аҭыҧ аҿы аус жәулоит», - ҳәа иҳәеит Аслан Бжьаниа.
«Аҳәынҭқарратә Еилакы агазеҭқәеи аинформациатә Маҵзуреи ирзоужьхо аҧаратә хархәагақәа рхылаҧшра ахахьы иагоит. Сара амассатә информациа ахархәагақәа рредакциатә политика сҽалазгалаӡом, аха Аҳәынҭқарратә Еилакы анапхгаҩы иаҳасабала гәазыҳәарак сымоуп – иӷәӷәоу афинанстә дисциплина ашьақәыргылара. Уи иабзоураны агазеҭқәа рредакциақәа рҿы иҟоу апроблемақәа рыхәҭаак иадамхаргьы аӡбареи рматериал-техникатә ҭагылазаашьа аиӷьтәреи алыршахоит», - ҳәа иҳәеит «Аҧсны Аҳәынҭқарра аимадареи амассатә коммуникациақәеи ацифратә ҿиареи рзы Аҳәынҭқарратә Еилакы ахантәаҩы Роберт Ҳалуашь. Уи иара убас иҟаиҵаз адыррақәа рыла, Аилак аҿы ҩ-газеҭк рредакциақәа рзы амашьына аахәара азҧхьагәаҭоуп, уи ала анаҩс агазеҭқәа атәыла араионқәа рахь анагара еиҿкаахоит. Роберт Џьопуа ишазгәеиҭаз ала, уи ҳазҭоу ашықәс нҵәаанӡа аҟаҵара рҽазыршәоит.
Ареспубликатә ҳәынҭқарратә Усбарҭа адиректор Хада Роберт Џьопуа ишазгәеиҭаз ала, иара араҟа иҟоу ажурналистцәа реиҳараҩык акыр шықәса раахыс хаҭала идыруеит, доусы рымчи рыхшыҩи еилаҵаны хра злоу аусура шеиҿкаахо азы агәыӷра шимоу ааирҧшит.
«Ҳаамҭазы агазеҭқәа аинформациатә ҵакыра аҿы аелектронтә массатә информациа ахархәагақәа рҿы аконкурентра аарҧшра рцәыуадаҩуп жәаҳәарада, аха уи апроблема аӡбаразы иҳалшо зегьы ҟаҳҵароуп. Аҳәынҭқарра аҟынтәи ацхыраареи адгылареи ҳауп ҳәа агәыӷра сымоуп», - ҳәа иҳәеит Роберт Џьопуа.
Кристиан Бжьаниеи Беслан Ҳалуашьи аусеицура аиҿкаара, аредактор хадацәа рыҟаҵареи рамхреи, ахолдинг ҿыц афункциа хадақәа, аструктура ҿыц аусбарҭақәа хҧа рыҿиараҿы инанагӡо ароль, аштаттә мшеизша, ауалафахәы ашьҭыхра, уҳәа ажурналистцәа рҟынтәи еиуеиҧшым азҵаарақәа рҭак ҟарҵеит.