Аҵарашықәс ианалага инаркны ауниверситети ашколқәеи русура хацыркхеит, аха убри аан астудентцәеи ашколхәыҷқәеи абиблиотекақәа рҿы инеины ирҭаху алитература агареи рзы алшара рымаӡам, избан акәзар абиблиотекақәа аркуп, убри аан иазгәаҭатәуп арҭ аусбарҭақәа рҿы массала ауаа реизра шымҩаҧысуа.

Аҧкратә уснагӡа аҳасабала амузеиқәеи атеатрқәеи русура аанкылоуп. 

Асанитартә ҳақьым Хада Лиудмила Скорик уажәы акоронавирустә ҿкы чымазара COVID-19 инамаданы атәыла аҿы иҟоу асанитар-епидемиологиатә ҭагылазаашьа азы адырра ҟалҵеит. Уи лажәақәа рыла, иарбоу апроблема даҽа 3-5 шықәса иҳацзар алшоит. 

«Аепидемиологиатә ҭагылазаашьа шыуадаҩыц иаанхоит, ааигәагьы уи аҭагылазаашьа аҽарҽеиуам». Уажәы уахыки-ҽнаки рыла иаарҧшхоит 100-ҩык  рҟынӡа ҿыц ари ачымазара злаҽыз апациентцәа. Акоронавирустә ҿкы чымазара ирласны амутациа мҩаҧысуеит, ицәырҵуеит «дельта», «дельта М» ҳәа изышьҭоу еиҳа ихьанҭоу аштаммқәа. Аҧсны алаҵәара ӷәӷәа амоуп аштамм «дельта». Ари иуадаҩу ачымазара аамҭа кьаҿ иалагӡаны арыҧҳақәа рзы акыр иуадаҩу ахҟьа-ҧҟьақәа цәырнагар алшоит.  Авирус алаҵәара аанкылара зылшо акызаҵәык ауп- уи авакцинациа ауп», - ҳәа иҳәеит асанитартә ҳақьым хада.

Лара акультура  аобиектқәа рнапхгаҩцәа русурахь ахынҳәара ирымоу агәазыҳәара еилылкаауеит, аха зегьы ирыцку  -авакцинациа ауп ҳәа иазгәалҭеит.

«Гәыдиса Едуард-иҧеи сареи шәобектқәа хәыҷы-хәыҷла аусура алаҳаргалоит, аха убри аан доусы шәколлективқәа ихымҧадатәиу асанитартә нормақәа ишрықәныҟәо ӷәӷәала ахшыҩзышьҭра аҳҭалоит, убри аамышьҭахь ауп акультуратә усбарҭақәа русура азы азин аныҟаҳҵо», - ҳәа илҳәеит Лиудила Скорик.

Акультура аусбарҭақәа рнапхгаҩцәа аусура ахацыркра азы ргәаанагарақәа рҳәеит.

«Еилкаауп акы, COVID-19 ҳәа изышьҭоу адунеизегьтәи апроблемагьы ыҟоуп, аха акультуреи аҟазареи русбарҭақәа рхыбгалара цәырызгаз  даҽа проблемакгьы ыҟоуп. Специалистк, кәашаҩык иааӡара азы ажәашықәсақәа аҭахуп. Мышкы иадамзаргьы уҽазыҟоумҵар, адыррақәеи уҟазаратә лшарақәеи лаҟәуеит. Шәара иаашәырҧшыз агәаанагарала ари апроблема даҽа хҧа-хәба шықәса иҳацзаауеит. Аха, ари аамҭа зегьы иалагӡаны ҳара аус муӡакәа ҳтәар, усҟан  аҵыхәтәантәи 30 шықәса ирылагӡаны иҳарҳаз адыррақәеи аҧышәеи зегьы ҳцәыӡуеит. Ари аусбарҭақәа зегьы аҵанакуеит. Сара схатәы гәаанагара абас иҟоуп: акультура аусбарҭақәа ихымҧадатәиу асанитар-епидемиологиатә нормақәа зегьы рынагӡарала иаарттәуп», - ҳәа иҳәеит Жәлар рырҿиара Ареспубликатә Центр адиректор Нури Кәарҷиа.

Фазиль Искандер ихьӡ зху аурыс драматә театр адиректор Иракли Хьынтәба еилкаам амзызсқәа рыла  аҧкратә уснагӡатәқәа атеатрқәа рымацара ауп иаҵанакуа ҳәа иҳәеит.

«Аҭагылазаашьа убас ишьақәгылеит, ҳара ҳкультура ашьҭахьтәи аплан ахь иҳаргылеит. Убас агәаанагара шьақәгылоит уи зынӡа агәхьаа ҳкымызшәа, избан акәзар  ҳазҵаарақәа роума, иҟаҳҵо аҳәарақәа роума, зегьы ахшыҩзышьҭра амамкәа иаанхоит. Ҳара ҳҽыҧхьакны ҳанхозшәа, Аҧсны акәша-мыкәша, Урыстәыла имҩаҧысуа ахҭысқәа ҳамбозшәа ҳхы мҩаҧаагоит. Шәара ииашаны ишәҳәоит, ачымазара злаҽыз ауаа рхыҧхьаӡара аизҳара атенденциа ыҟоуп, аха уи акала акультура аусбарҭақәа ирыдҳәалаӡам. Аха  уеизгьы ҳара ҳҿы ачаратә залқәа, ашколқәа аус руеит. Еилкаау усуп, араҟа амедицинатә сабрадақәа аӡәгьы иныҟәигаӡом. Ари аҵакыдароуп. Ҳара иаҳҭаху аҳәынҭқарра аҿы ишьақәыргылоу ахыдҵақәа зегьы инарыгӡаларц. Ас еиҧш аҭагылазашьа аҿиара ҳара моралла ҳланарҟәуеит», - ҳәа иҳәеит Иракли Хьынтәба.

Атеатрқәа, амузеиқәа, абиблиотекақәа русура алагара ахымҧадатәра иара убас иалацәажәеит Аҳәынҭқарратә музеи адиректор Аркади Џьопуеи Амилаҭтә библиотека адиректор Борис Ҷолариеи.

Аилацәажәара аихшьаалақәа рыла, акультура аусбарҭақәа русура алагара азы аҳәара зну ааҧхьара аиқәыршәареи, анаҩс уи ауааҧсыра акоронавирустә ҿкы чымазара рацәыхьчара азы Акоординациатә Штаб ахь анашьҭреи рзы аӡбамҭа рыдыркылеит.