Ҭемыр Агрба иарбоу амҩадуқәа рҿы аиҭашьақәыргыларатә аусурақәа рынагӡара адхалара мзызс иамоу дазааҭгылеит.

«Аханатә Аинвестициатә Программа иарбоу амҩадуқәа рҿы лассы-лассы аӡы ахьықәло инамаданы иԥсахтәны иҟаз  ақәыршҩытә коллекторқәа алагаламызт.  Ишаабо ала, иарбоу амҩадуқәа рҿы аӡымҩангагақәеи ацрыӡмҩангагақәеи аҿыцқәа рыла иԥсаххоит, ақәыршҩытә коллекторқәа шыҟац иаанхар акәхоит. Уи иашахарым. Убри аҟнытә ҳара егьырҭ аобиектқәа рҿы аекономиа аҳасабала иахәҭоу аԥаратә хархәагақәа ҳаԥшааит, иҿыцу ақәыршҩытә коллекторқәа рышьҭаҵара Аинвестициатә Программа иалаҳгалеит аусурагьы иацаҳҵеит», - ҳәа адырра ҟаиҵеит Ҭемыр Агрба.

Иарбоу аобиектқәа рҿы анардкылаҩцәас иҟоуп Аҟәа ақалақь Ахадара Амҩатә еиҭашьақәыргыларатә Усбарҭеи «Аӡыканали».

Апроект ахарџьынҵатә хәыԥса аизырҳара инамаданы апроект-харџьынҵатә документациа еиҭа аекспертиза иахысуеит.

«Аха убас ишыҟоугьы анардкылаҩцәа аанымкылаӡакәа аусурақәа нарыгӡоит. Абазаа рымҩаду аҿы аусурақәа 90 % рҟынӡа инагӡоуп, Џьонуеи Гәлиеи рымҩадуқәа рҿы – 80% рыла.

Иахәҭоу аусшәҟәқәа шааҳаулак еиԥшҵәҟьа, инагӡоу аусурақәа рзы актқәа ҳнапы аҵаҩны инагӡоу аусурақәа рзы ашәатәқәа зегьы наҳагӡоит», - ҳәа иҳәеит Ҭемыр Агрба.

Иааизакны аҟәатәи амҩадуқәа рҿы  аиҭашьақәыргыларатә усурақәа ирықәхарџьхоит 140 млн мааҭ.