Аслан Бжьаниа раԥхьа даҭааит ҳазҭагылоу аамҭазы арҽеиратә усурақәа ахьымҩаԥысуа аиҵастанциа "Бзыԥ-220". Ари астанциаеиҵа ареспубликаҟны иҟоу астанциа дуқәа ируакуп. Шьаҭанкылтәи аргылара Аусбарҭа анапхгаҩы Ҭемыр Агрба иҟаиҵаз адҳыррақәа рыла, уи аиҭашьақәыргылара ахарџьԥса иартәоит - 540 млн. мааҭ. Урҭ рахьтә амыруга иазԥхьагәаҭоуп 440 млн. мааҭ, иаанхаз ахәҭа аргылара-монтажтә усурақәа рымҩаԥгара иазкхоит. Уажәы ари иазку ахархәагақәа рахьтә абжеиҳарак хархәара аҭоуп. Иаҭаху аусурақәа зегьы рымҩаԥгара анаҩс 80-90 МВт амчхаралшара змоу.

Аиҵастанциа иреиҳаӡоу аидара иартәароуп 250МВт. Арҿыцратә усурақәа рхыркәшара азгәаҭоуп 2022 шықәса анҵәамҭазы.

Иара убас Ахада дахәаԥшит ҳазҭоу ашықәс азы аԥша бааԥс аныҟала амашәыр ӷәӷәа ахьыҟалаз аиҭашьақәыргыларатә усурақәа шцо Аҳаиртә цәаҳәа «Ԥсоу-220» аҟны.

«Амшынеиқәафымцамч» Адиректор хада инапынҵақәа назыгӡо Ҭенгиз Гырџьынба иҿыцу ашьаҟақәа хәба шышьақәыргылоу азы адырра ҟаиҵеит.

Ари ацәаҳәа ивольтҳараку Афымцастанциа «Аҽгәара» аусура анеиԥҟьо аамҭазы Урыстәылантәи Аԥсныҟа афымцамч аиагара алнаршоит. Уи абжьазаара – 38,7 километр рҟынӡа инаӡоит. Амчхара – 220 киловатт.