АСАПИОРЦӘА «ГАРАНТ-БАНК» АХЫБРА АГӘАҬАРА МҨАԤЫРГОИТ.
Аҟәа. Жьҭаарамза 13, 2021 шықәса. Аԥсныпресс. Асапиорцәа ҷыдала иазыҟаҵоу алақәа рыцны Акоммерциатә Банк «Гарантә Банк» аофис хада ахыбра агәаҭара мҩаԥыргоит. Ахыбра акәша-мыкәша узеимнеиуа иаркуп. Ахҭыс ахьыҟалаз аҭыԥ аҿы иҟоуп атәыла аҩныҵҟатәи аусқәа Рминистрра, иҷыдоу аҭагылазаашьақәа рзы Аминистрра, аҳәынҭқарратә шәарҭадара Амаҵзура аусзуҩцәа.
Амилициа аусзуҩцәа «Гарант-Банк» егьырҭ аҟәшақәагьы рахь узымнеиуа иакәшаны игылеит, избан акәзар ҭелла иҟаз адырра аҿы аҭыӡҭыԥ арбаӡамызт.
Иахьа, жьҭаарамза 13 рзы атәыла аҩныҵҟатәи аусқәа Рминистрра ахь зхаҭара шьақәыргыламыз аӡәы Акоммерциатә Банк «Гарант-Банк» ахыбра арҭҟәацга аҵоуп ҳәа адырра ҟаиҵеит.
