Аҟәа. Жьҭаарамза 2, 2021 шықәса. Аԥсныпресс. Аԥсны Ахәаахәҭра-Ааглыхратә Палата атуризм азы Уралтәи Ассоциациа ааԥхьарала ақалақь Екатеринбург, Б.Н. Ельцин ихьӡ зху Апрезиденттә центр аплошьадка аҿы жьҭаарамза 1 – 2 рзы имҩаԥысуа Жәларбжьаратәи атуристтә цәыргақәҵа «Expotravel - 2021» ахы аланархәуеит. Аделегациа напхгара аиҭоит Аԥсны Ахәаахәҭра-Ааглыхратә Палата анапхгараҭара алахәыла Адгәыр Лышәба. Аделегациа аилазаара аҿы иҟоуп Апалата аусзуҩцәеи Аԥсны атуризм азы Аидгылара апрезидент Анна Колиагинеи.
Ацәыргақәҵа аусуратә программа иалагалоуп Урыстәылатәи атуристтә индустриа Аидгылара аегида ала жәларбжьаратәи атуристтә цәыргақәҵа аныҳәатә аартреи апленартә еилатәареи, EXPOTRAVEL Афорум, атермальтә туризм аҿиара азы Жәларбжьаратәи аконференциа Thermal Travel SPA, аԥснытәи аҩқәа рҭыжьыҩцәа рцәаҳәа адгалара мҩаԥысраны иазхьыҟоу агәырӷьаратә дкылара.
Аԥснытәи апавилион адҵаалара ду амоуп, уи иаҭаауа рыбжьара иҟоуп изныкымкәа Аԥсныҟа иаахьоу, избахьоу ауаа. Аҭааҩцәа алшара рымоуп аԥсуа ҩқәа ргьама абара, анаҩс Аԥсны еиуеиԥшым атуристтә обиектқәа, аԥснытәи аҭыжьыҩцәа раалыҵқәа рзы адыррақәа раиура.
Аԥсны апавилион даҭааит Аԥсны атәы имаҷымкәа издыруа, Екатеринбург иҟоу Италиа ҳаҭыр зқәу аконсул Роберто Диагостино. Уи гәахәара дула аԥснытәи аҭыжьыҩцәа раалыҵ ргьамақәа ибеит, иара убас ааигәа Аԥсны аҭааразы агәазыҳәара шимоу азгәеиҭеит.
Ацәыргақәаҵа алахәылацәа рзы еиҿкааз абанкет аҿы убасҵәҟьа аԥсуа ҩқәа рыдгалара мҩаԥган.
Екатеринбург аҿы атуризм азы Уральтәи Асоциациеи Аԥснытәи атуризм азы Аидгылареи рыбжьара аусеицуразы Аиқәшаҳаҭра анапаҵыҩра мҩаԥысит.
