Аҟәа. Цәыббрамза 27, 2021 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны Аҳәынҭқарра Атәылахьчара Аминистрра аилазаара Аиааира амш 28 шықәса ахыҵра рыдиныҳәалеит.
Адныҳәаларатә цҳамҭа аҿы, ахәҭакахьала иазгәаҭоуп:
«Аҩызцәа аофицарцәа!
Ҳара ҳтәыла аҭоурых адаҟьақәа рҿы ирацәоуп ҳҳәынҭқарра аиқәырхареи ашьақәгылареи рыҟны аҵакы ӷәӷәа змоу арыцхәқәа. Жәаҳәарада, ҳара ҳзы аныҳәақәа зегьы ирныҳәоуп - 1992-1993 шш. Аԥсны Аџьынџьтәылатә еибашьраҿы игаз Аиааира Амш.
Аԥсны иҟаӡам ҭаацәарак, аибашьра агәаҟра ззаанамгаз, ирацәаҩуп иреиӷьыз Аԥсны арԥарцәеи аҭыԥҳацәеи рыҩныҵҟа ари амш зыԥсҭазаарақәа ахҭнызҵаз.
Зегьы ҳара иаҳҿагылан. Адунеитә уаажәларра иаартны Қырҭтәыла иадгыланы ҳпозициа алаҳәаразы азин ҳамырхырц иаҿын. Ҳамчқәа зегьы еибыҭаны, аӡәк еиԥш ҳанеидгыла, ҳажәлар ирылшеит иҟаз аԥынгылақәа зегьы риааира. Аамҭа хьанҭа ҳашҭагылазгьы, иаарласны арратә напхгареи архәҭақәеи реиҿкаара ҳалшеит. Аԥсны Аҳәынҭқарра Арбџьармчқәа еиҿкаау еилазаарак аҳасабала рхы аадырԥшит, адгьыл аҟнеиԥш, аҳауаҟны, аӡаҟны иарбанзаалак ицәырҵуаз аҳасабтәқәа рыӡбара рылшеит.
Илҵшәадаз, итрагедиатәыз ажәыларақәа шыҟазгьы, ҳара ҳархәҭақәа рнапхгара ирылшеит амчқәа реизгара, аӷа дԥыххаа иқәҵара.
Ҳажәлар реиқәырхараҟны иҷыдоу ароль нарыгӡеит Нхыҵ-Кавказ ҳаиашьаратә жәларқәа, Урыстәылантәи хатәгәаԥхарала иааны иеибашьуаз, Ҭырқәтәылантәи, Иорданиантәи, Шьамтәылантәи ҳџьынџьуаа, уҳәа убас егьырҭ атәылақәа рҟынтәи. Ҳарҭ ахааназы иаҳхашҭуам ҳхьыԥшымра аагараҿы урҭ рлагаламҭа ду.
Аҭагылазаашьа схы иархәаны, Аԥсны Аҳәынҭқарра атәылахьчара Аминистрра аилазаара, Аиааиреи аҭынчреи ҳзаазгаз ҳветеранцәа зегьы иҭабуп ҳәа расҳәарц сҭахуп, иара убас иҭабуп ҳәа расҳәоит инарыгӡо рмаҵзуарзы асолдаҭцәеи аофицерцәеи.
Ашәарҭадара азҵаараҟны ҳара ҳакзаара аҵак дуӡӡа амоуп.
Иааиуа Аиааира Амш шәыдысныҳәалоит!»
