.Аҟәа. Цәыббрамза 27, 2021 шықәса. Аԥсныпресс. Аԥсны аԥыза-министр Алеқсандр Анқәаб аунитартә наплакы «Аҟәатәи Автотранспорттә Наплакы» адиректор Леонид Шәлымба, адиректор ихаҭыԥуаҩ Галина Шларбеи анаплакы аҳасабеилыргаҩы хада Инга Қаԥбеи идикылеит.
Аминистрцәа Реилазаара аофициалтә саит аҿы иҟоу адыррақәа рыла, аиԥылара аҿы анаплакы автопарк аныҟәгара иацу апроблемақәа, уи ауааԥсыра ишахәҭоу ала ауаажәларратә транспорт ала реиқәыршәара азы арҿыцра азҵаарақәа ирылацәажәеит.
Аиԥылара аҿы ишазгәаҭаз ала, анаплакы акредитортә уал 6 млн мааҭ иреиҳауп. Уи ашәахтәқәа, еиуеиԥшым абиуџьеҭнҵыҵтәи афондқәа рахь ахыхтәқәа, аресурстә еиҿкаарақәеи (аӡыканал уҳәа егьырҭгьы), иара убас аныхтә материалқәеи атранспорт азы аԥсахга хәҭақәеи раагаҩцәеи рҿаԥхьа иақәу ауал ауп.
Анаплакы абаланс аҿы иҟоуп 73 цыра атехника.
Аҟәатәи Автотранспорттә Наплакы напхгара анаҭоит 30 инарзынаԥшуа еиуеиԥшым амаршрутқәа (ақалақьтә, ақалақьнҭыҵтәи, ақалақьбжьаратәи, жәларбжьаратәи).
Аиԥылара аихшьаалақәа ҟаҵо Алеқсандр Анқәаб аекономика Аминистрреи Аҟәа ақалақь Ахадареи анаплакы аҿы иҟоу аҭагылазаашьа еилкааны хазы игоу апроблемақәа рыӡбара алыршаразы амҩақәа рыԥшаареи рзы анапынҵақәа риҭеит.
