Аҟәа. Цәыббрамза 15, 2021 шықәса. Аԥсныпресс. Цәыббрамза 16-17 рзы Аҟәа ақалақь аҿы аԥсыӡтә нхамҩа азы Аԥсны-Урыстәылатәи акомиссиа абыжьбатәи асессиа мҩаԥыслоит.
Ареспублика Аԥсни Урыстәылатәи Афедерациеи Рнапхгарақәа жьҭаарамза 16, 2010 шықәса рзы аԥсыӡтә нхамҩа аусхкы аҿы аусеицуразы ирыбжьарҵаз Аиқәшаҳаҭра инақәыршәаны, Акомиссиа аилатәарақәа ианаҭахха аамҭазы инеимда-ааимданы аҩ-ҳәынҭқаррак иахьаҵанакуа имҩаԥысуеит.
Акомиссиа аусура аҳәаақәа ирҭагӡаны аганқәа амшынеиқәатә регион аҿы аквакультуреи аԥсыӡкреи рҭагылазаашьа, аӡытә биоресурсқәа рыкреи, аквакультура аалыҵ ашәагаақәа, иарбоу аамҭахәҭа азы аԥсыӡнхамҩатә усбарҭақәа рыбжьара анаука-техникатә усеицура аплан анагӡара, уҳәа иадҳәалоу азҵаарақәа ирылацәажәараны иҟоуп.
Иалацәажәараны иҟоуп иара убас Урыстәылатәи Афедерациа иатәу аԥсыӡкратә флот аӷбақәа рыла Аԥсны Аҳәынҭқарра аиурисдикциа иаҵанакуа аӡқәа рҿы аӡынтәи аамҭахәҭа азы ақамшьиа акра азеиԥш шәагаақәа ралкаара азҵаара.
Асессиа аусура Аԥсны аԥыза-министр актәи ихаҭыԥуаҩ, ақыҭанхамҩа аминистр Беслан Џьопуеи аԥсыӡкра азы Азов-Мшынеиқәатәи атерриториалтә усбарҭа Афедералтә агентра анапхгаҩы Игорь Рулиови рхантәаҩрала имҩаԥысуеит.
Аусмҩаԥгатә амҩаԥгара аҭыԥи аамҭеи: ақ. Аҟәа, Леон Ипроспект, аҩны № 9 (аусутә центр «Эверест» аконференц-зал аҿы), асааҭ 10:00 рзы.
