Асанитартә ҳақьым хада иара убас арҵаҩцәа рвакцинациа ахымԥадатәра атемагьы дазааҭгылеит. «Сара жәаҳәарада еилыскаауеит, авакцинациа азы амедицинатә ԥырхагара змоу арҵаҩцәа шыҟоу, аха асиа ала авакцинациа иацу амедицинатә ԥырхагара зынӡа имаҷуп.

Сгәы иаанагаӡом акоронавирустә ҿкы чымазара COVID-19 азы авакцинациа азы амедицинатә ԥырхагара змоу арҵаҩцәа русуратә ҭыԥқәа рҿы иаанкылап ҳәа. Убри аҟнытә  ахәыҷқәа рҟынтәи ироуа ақәыӷәӷәара духоит», - ҳәа иҳәеит Лиудмила Скорик.

Уи иара убас иазгәалҭеит уажәы иҟоу аҳауа аԥхарра аҵаратә процесс ахацыркра азы акыр иманшәалоуп ҳәа. «Макьана амшқәа бзианаҵы аклассқәа рҿы ԥсабарала аҳауаеиҭарсра азы алшара ыҟоуп.  Убри аҟнытә ҳара еиҭамгакәа аҵаратә процесс ҳалагоит.  Аӡынра-ааԥынтәи аамҭахәҭа азы, ахәыҷқәа риммунитет анԥсыҽу, лассы-лассы ареспиратортә чымазарақәа анрыхьуа аамҭазы ҳара аԥсшьараамҭақәа ирыцаҳҵоит.  Уажәы ахәыҷқәа адыррақәа раиуразы алшара рымоуп», - ҳәа инаҵшьны иазгәалҭеит лара.

Убри аан Лиудмила Скорик ахәыҷқәа аурокқәа рҿы асабрадақәа рҿаҵаны ишзымтәо азгәалҭеит.

Асанитартә ҳақьым Хада иҟалҵаз адыррақәа рыла, цәыббрамза 15 инаркны агәабзиарахьчара Аминистрра арҵаҩцәа риммунатә статус аҭҵаара апрограма аланагалоит. Ахархәара аиуеит иара ачымазара аҟынтәи еиԥш авакцинациа аҟынтәгьы атәымцәеижьҿагылақәа ралкааразы атест-системақәа. «Ас еиԥш алшара ҳамоуп, иҟоуп уи азы иахәҭоу атест-системақәагьы. Аҵаратә процесс иалахәхо арҵаҩцәа зегьы хәыда -ԥсада ргәабзиара аҭагылазаашьа ҭҵаахоит», - ҳәа адырра ҟалҵеит Лиудмила Скорик.

Асанитартә ҳақьым Хада лажәақәа рыла, арҵаҩцәа гәыԥ-гәыԥла реихшареи аҵаратә процесс еиҭк-еиҭакуа амҩаԥгареи аԥыхуп, избан акәзар ас еиԥш иҟоу аҭагылазаашьақәа раан арҵаҩцәа рырҵаҩратә қәыӷәӷәара акыр еизҳауан.

«Ииашоуп, ԥыхьа иҟаз аҭагылазаашьақәа раан, иҳаҩсыз аҵарашықәс аан ачымазара злаҽыз ахәыҷқәа рхыԥхьаӡара еиҳа имаҷын, аха арҵаҩцәа рықәыӷәӷәара акыр еиҳан. Уажәы зыдгалара мҩаԥгоу аҭагылазаашьақәа еиҳа иманшәалоуп. Мышкала арҵаҩы еиҭак-ааиҭакуа иоуаз авирустә қәыӷәӷәара абжьааԥнытәи аҵаратә схема аан иоуаз иаҟаран. Аха убри аан, арҵаҩы иибоз аџьабаа иахҟьаны аковид адагьы, егьырҭ ачымазарақәа дырцәызыхьчоз аиммунитет лаҟәуан», - ҳәа иазгәалҭеит лара.

«Ҳара ҳарҵаҩцәа егьырҭ ачымазарақәа рыла  еиҳа лассы-лассы ичмазаҩхо иалагеит, ареабилитациа акәзар еиҳа иуадаҩны имҩаԥысуан.  Убри аан апсихологиатә қәыӷәӷәареи ааԥсареи ирызҳауан.  Арҵаҩцәа рааԥсара армаҷра азы ҳара ԥыхьатәи асхема ахь ахынҳәра азы аӡбамҭа ҳадаҳкылеит. Аха урҭ акоронавирустә ҿкы чымазара аҟынтәи изыхьчо авакцианациа мацара ауп», - ҳәа иазгәалҭеит Лиудмила Скорик.

Асанитартә ҳақьым Хада лгәаанагарала, аԥкрақәа зегьы рынагӡара залыршахар, усҟан иҷыдоу аҭагылазаашьақәа шьақәгылаӡом, аҵаратә процессгьы еиԥҟьарада имҩаԥыслоит.