Аҭагылазаашьа ҷыдақәа рзы аминистр Лев Кәыҵниа аԥсшьара аамҭа аҽазыҟаҵара иазку русуразы аинформациа риҭеит.

Агәабзиарахьчара аминистр Ҭамаз Ҵахнакиа иажәахә аҟны дазааҭгылеит атәылаҟны иҟоу аепидимиологиатә ҭагылазаашьеи 2021 шықәсазтәи аԥхынтәи аԥсшьара аамҭазы акороновирустә ҿкы чымазара иаҿагыланы ақәԥаразы  имҩаԥырго ауснагӡатәқәа ртәы.

Аизараҟны иара убас дықәгылеит атәыла асанитартә ҳақьым хада Лиудмила Скорик. Уи далацәажәеит аԥсшьара аамҭазы ауаа рхыԥхьаӡара зларацәахо ала, ауаа реимадара иаҳа излазҳауа ала, акоронивирустә ҿкы чымазара аҿагыларазы агәҽанҵаратә уснагӡатәқәа ртәы.

Аҳәынҭқарра Ахада асанитартә ҳақьым хада длазҵааит аԥсшьаҩцәа рынхарҭа ҭыԥқәа рыҟны асанитартә ҭахрақәа хылаԥшра рызҭо азы. Лиудмила Скорик излалҳәаз ала, асасааирҭақәа рнапхгаҩцәа рхаҭақәа ахылаԥшлароуп 2020 шықәса рзы Урысхархәарахылаԥшреи дареи иаздырхаиз аинструкциа ақәныҟәарала асанитартә-епидемеологиатә ҭахрақәа рынагӡара. Аҳәынҭқарра Ахада иазгәеиҭеит анормақәа зегьы рықәныҟәара шымҩаԥысуа азы атуризм аминистрра аҭакԥхықәра шаду.   

Аԥхынтәи аԥсшьара аамҭазы Аԥсны Аҳәынҭқарра Ашәарҭадара Амаҵзура Аҳәаахьчаратә отриад аусура иазкыз адырра ҟаиҵеит Аҳәынҭқарра Ашәарҭадара Амаҵзура ахантәаҩы ихаҭыԥуаҩ - Аԥсны Аҳәынҭқарра Ашәарҭадара Амаҵзура Аҳәаахьчаратә отриад аиҳабы Русҭам Латипов.

Аԥсшьара аамҭа аҽазыҟаҵаратә усурақәа ирызкны Аиҳабыра реилазаара злахәны имҩаԥысыз инарҭбааз аилатәараҟны ашәахтәқәеи аизгақәеи рминистр инапынҵақәа назыгӡо Мераб Логәуа 2019шықәса, 2020шықәса рзы Аусбарҭа аусура аҳасабырба дазааҭгылеит.

Аҟәатәи, Гагратәи, Гәдоуҭатәи Администрациақәа рхадацәа Беслан Ешба, Иури Хагәышь, Баграт Боџьгәуа иазгәарҭеит гәацԥыҳәарала аԥсшьара аамҭа аҽазыҟаҵара ишаҿу, иагьалацәажәеит имҩаԥыргаз аусурақәа ртәы. 

Алкаақәа ҟаҵо, Аҳәынҭқарра Ахада иҳәеит: «Ҳарҭ зегьы агәыӷра ҳамоуп аԥсшьара аамҭазы асасцәа рхыԥхьаӡара рацәахоит ҳәа. Аусбарҭақәа ахьынӡазыхио, сара сызлахәаԥшуа ала, уажәазы хар амам ҳәа уҳәаратәы иҟоуп, аха уи аҟны ҳаангылар ҟалаӡом», - ҳәа иҳәеит Аслан Бжьаниа.

Иара убас, Аслан Бжьаниа Аҳәынҭқарратә автоинспекциеи Адәныҟатәи аусқәа Рминистрреи  рахь адҵа ҟаиҵеит автотуристцәа рахь азҿлымҳара ҷыда аадырԥшларц.

«Аҭагылазаашьа бзиа рзаԥҵатәуп, амҩаҿы раанкылара аҵаҵӷәы амазароуп, уи азы аматериал ыҟазароуп, ма аилагара ӷәӷәақәа ҟарҵазар. Егьырҭ аҭагылазаашьақәа рҿы, ус баша адокументқәа ҳрыхәаԥшуеит ҳәа автотуристцәа рыргәамҵра аҭахым. Аԥсшьаҩцәа ибзиоу агәаанагара роуроуп. Иара убас амҩатә инфраструктура иацхраатәуп ишахәҭоу иҟазарц азы»,- ҳәа иҳәеит Аҳәынҭқарра Ахада.