Аҟәа. Жәабранмза 23, 2022 шықәса. Аԥсныпресс. Иахьа Аԥсны Жәлар Реизара-Апараламент ахь имҩаԥысраны иҟоу алхрақәа ирызкны аоппозициатә мчрақәа рыпресс- конференциа мҩаԥысит.
Апарламент адепутат Алхас Џьынџьал иахьа уажәраанӡа апандемиа ҳасаб азуны алхрақәа рымҩаԥгараан асанитартә нормақәа шьықәырӷәӷәаӡам ҳәа иазгәеиҭеит. Иҟоу адыррақәа рыла, иарбоу анормақәа агәабзиарахьчара Аминистрреи Асанитар-епидемиологиатә Станциеи рҿы ишьақәыргылазароуп, алхратә комиссиа Хада акәзар, урҭ рынагӡара азы иахәҭоу аҭагылазаашьақәа еиқәнаршәароуп. Мап анакәха, аҳәынҭқарра ишахәҭоу ала атәылауаа рконституциатә зинқәа нагӡаны рыхьчара залшаӡом.
Ауаажәларратә еиҿкаара «Аԥсуа жәлар Реиҿкаара» анапхгаҩы Адгәыр Арӡынба алхырҭатә ҭыԥхадақәа рҿы азинеилагарақәа рганахьала ауааԥсыра рҟынтәи ашшабӷьыцқәеи аҳәамҭақәеи уахи-ҽни иааиԥмырҟьаӡакәа иахьрыдыркылало аплошьадка шаԥҵахо азы адырра ҟаиҵеит. Уи азы аҳҭнықалақь агәаны аофис аартра, иара убас асоциалтә каҭақәа мҽхакы ҭбаала ахархәара азԥхьагәаҭоуп. Еизгахо адыррақәа зегьы Апрокуратура Хада ахь инашьҭхоит.
Адгәыр Арӡынба иажәақәа рыла, алхрақәа рыпроцесс амҩаԥгараҿы зегьы раасҭа ихадоу – уи амҩаԥгара аҵакы амырӡра.
Ауаажәларратә усзуҩ Ахра Бжьаниа абыжьбатәи ааԥхьара Апарламент иаӡбаша азҵаарақәа ртәы далацәажәеит. Уи игәаанагарала, уи зегьы раԥхьаӡа иргыланы, алхратә закәанԥҵара ареформақәа рымҩаԥгареи аҳәынҭқарратә напхгараҭара апроцесс еиҳа иаартны иҟаларц азы азакәанԥҵаратәии анагӡаратәии аӡбаратәи амчрақәа рыбжьара азинмчы аихшареи ауп.
Аоппозициа акандидатцәа апартиақәа рҟынтәи акәымкәа аԥшьгаратә гәыԥқәа рыцхыраарала изықәдыргылои ҳәа азҵаара аҭак ҟаҵо аспикерцәа рыхҩык уажәы атәыла аҿы инагӡаны иҭышәынтәаланы ишьақәгылахьоу апартиақәа ыҟаӡам, акандидатцәа ракәзар, урҭ раппозициара акыр ахьыԥшратә ҟазшьа амоуп ҳәа иазгәарҭеит.
