Аҟәа. Жәабранмза 14, 2022. Аԥсныпресс. Урыстәылатәи Афедерациа аҟны иҟоу Аԥсны Аҳәынҭқарра Ацҳаражәҳәарҭа аҿы аҿар ацхырааара рыҭара азы Ацентр «Аԥсны аԥеиԥш» аусура ахацыркра мҩаԥысит. Ари Ацентр аусура аконскурстә шьаҭа ала Аԥснытәи аҿар Урыстәыла астажировкақәа рахысреи аҵарадырреи рзы ацхыраара рыҭара иазкхоит. Ацентр амеханизм аусура Урыстәыла аус ацура Ахаҭарнакра аресурсқәа иеицтәараны имҩаԥыслоит.
Ацентр акоординатор Едгар Гәазаа акандидатцәа ралԥшаара шымҩԥысло атәы далацәажәеит: «Алԥшаара амеханизм аконкурстә шьаҭала имҩаԥысуеит: акандидат Ацҳаражәҳәарҭа, ма адәныҟатәи аусқәа Рминистрра аофициалтә саит аҿы анкета хаирҭәәауеит, изанааҭдырра аҩаӡара (иквалификациа) ашьҭыхра ахьиҭаху аусхкы аирбоит, анаркьаҿ (арезиуме) дәықәиҵоит. Актәи аетап дахысны дҟалозар, акандидат Урыстәыла иҟоу Аԥсны Ацҳаражәҳәарҭа аусзуҩцәа рыҿцәажәарахь ааԥхьара иоуеит. Аиҿцәажәараҿы апретендент имоу аиуридициа, адыррақәа, аусдырра (акомпетенциа) ааирԥшыроуп», - ҳәа иҳәеит Едгар Гәазаа.
Аԥсны адәныҟатәи аусқәа рминистр Инал Арӡынба иԥхьагылоу Урыстәыла иреиҳаӡоу аҵараиурҭақәа рнапхгаҩцәеи – Урыстәылатәи Афедерациа адәныҟатәи аусқәа Рминистрра аҟны иҟоу Жәларбжьаратәи аизыҟазаашьақәа рзы Москаватәи Аҳәынҭқарратә Институт (Ауниверситет) Аректор Анатоли Торкунови, Амилаҭтә Ҭҵааратә Университет Аекономика Иреиҳаӡоу Ашкол Аректор Никита Анисимови, Урыстәылатәи Афедерациа адәныҟатәи аусқәа Рминистрра аҟны иҟоу Адипломатиатә Академиа Аректор Александр Иаковенкои, Урыстәылатәи Афедерациа Анапхгара аҟны иҟоу Афинанстә Университет Аректор Станислав Прокофиеви иареи русуратә еиԥыларақәа рҿы Ацентр «Аԥсны аԥеиԥш» аусура апараметрқәа дрылацәажәеит.
Аганқәа аусцеицура аганахьала еиқәшаҳаҭхеит, иара убас ааигәатәи аперспектива азы аусуратә план шьақәдыргылеит.
