Аҟәа. Ажьырныҳәамза 21, 2021 шықәса. Аԥсныпресс. Ажьырныҳәамза 21 инаркны Аԥсны иалагаоит Жәлар Реизара-Апарламент адепутатрахь акандидатцәа рықәыргылара. Апарламент ахь иалххоит амажоритартә система ала 35-ҩык адепутатцәа.
Адепутатрахь акандидатцәа рықәыргылара азы азин рымоуп Аԥсны аиустициа Аминистрра аҿы ашәҟәы иҭагалоу аполитикатә партиақәеи алхыҩцәа ргәыԥқәеи. Уи мҩаԥысыроуп иҟоу Апарламент аилазаара азинмчы анҵәара хәымз шыбжьоу.
Аполитикатә партиақәа хымԥада Алхратә Комиссиа Хада аҟны ашәҟәы иҭагалазароуп.
«Аԥсны Жәлар Реизара-Апарламент адепутатцәа ралхра азы» Аԥсны Аҳәынҭқарра Азакәан ахәҭаҷ 4 инақәыршәаны, адепутатрахь акандидатцәа рықәыргылара иалагоит алхрақәа рымҩаԥгара амш 50 мшы шыбжьоу, иагьхыркәшахоит алхрақәа рымҩаԥгара амш 30 мшы шыбжьоу. Аҳәынҭқарра Ахада иҭижьыз Аусԥҟа инақәыршәаны Апарламент ахь алхрақәа мҩаԥгахоит хәажәкырамза 12, 2022 шықәса рзы.
Аполитикатә партиақәа алхратә ҭыԥхадақәа зегьы рҿы кандидатурак ықәдыргыларц азы азин рымоуп.
Аполитикатә партиа иарбоу апартиа иалоу атәылауаҩ икандидатура, иара убас иарбоу апартиа, мамазаргьы даҽа партиак иалам атәылауаҩы икандидатура ақәыргылара азин амоуп. Аполитикатә партиа егьырҭ аполитикатә партиақәа рылахәылас иҟоу атәылауаа ркандидатура ақәыргылара азин амаӡам.
Алхыҩцәа ргәыԥқәа рҟынтәи акандидатцәа рықәыргылараан зеилазаара хәҩык иреҵамкәа алхыҩцәа рыла ишьақәгылоу аԥшьгаратә гәыԥ аԥҵара хымԥадатәиуп. Аԥшьгаратә гәыԥ Алхратә Комиссиа Хада аҿы ашәҟәҭагалара иахысроуп.
Алхыҩцәа ргәы аҟынтәи адепутатрахь акандидатура ақәыргыларазы уи ишидгыло азы еизгазароуп 200 иреиҵамкәа, 250 иреиҳамкәа аокруг алхыҩцәа рнапынҵақәа.
