Аноминациа «Проза» аҿы апремиа ажиури ианаршьеит Герман Власов ишәҟәы «Серебрянная рыба золотая» азы. Иалкаау ажәеинраалақәа: 2003-2019шш», ҳәа еиҭарҳәеит ПЕН-центр аҿы.

Аурыс бызшәала изыҩуа Казахтәи апоет апрозаик Бахыҭ Жан (Бахыҭжан Канапианов) аноминациа «Ахәыҷра аҵла» аҿы алауреатра инашьахеит. Ажиури аҳамҭа ианаршьеит аповестқәеи ажәабжьқәеи ажәамаанақәеи знылаз ишәҟәы «Иноходец судьбы» азы. 

Аноменациа «Хәы змаӡам аҭынха» аҿы аиааира игеит аҧсуа прозаик Даур Наҷҟьебиа иажәабжьқәа «Аҧсаҭара», «Алаҟә», «Аҵеиџь» рзы. Ари арҿиамҭақәа автор ихаҭа аурыс бызшәахьы еиҭеигеит.

Аноминациа «Акиносцинари» аҿы иреиӷьу усумҭаны иалкаахеит Фазиль Искандер иажәабжьқәа рмотив ала иҩу «Волосатая гусеница», «Запретный плод», «Дедушка». Аусумҭақәа аҧылҵеит акиносценарист апрозаик Лилиа Костенко.  

«Ҳапремиа ахәбатәи ацикл ахыркәшамҭахь инеит. Иҳаҩсыз ашықәсқәа ҳрызхьаҧшуа ҳалагар, инаҵшьны иазгәауҭур алшоит: апремиа қәҿиарала имҩаҧысит ҳәа! Алауреатцәеи афиналистцәеи рхыҧхьаӡараҿы иҟан еицырдыруа реиҧш, ҳконкурс асиақәа ианылаанӡа  ииашакәа хшыҩзышьҭрада иаанханы иҟаз ашәҟәыҩҩцәа маҷымкәа. Иҟан аартрақәагьы. Уажәтәи асезон азы убас еиҧш иҿыцу цәырҵраны дҟалеит сибратәи ашәҟәыҩҩы Сергеи Кузнечихин», - ҳәа апремиа ажиури ахантәаҩы, Урыстәылатәи ПЕН-центр апрезидент Евгени Попов иажәақәа цитатас иааго адырра ҟарҵоит Аиҿкааратә Комитет аҟны. 

Ажиури алахәыла, Урыстәылатәи ПЕН-центр апрезидент ихаҭыҧуаҩ Борис Евсеев еиуеиҧшым авторцәа еидызкыло «апремиақәа рполитра аиҧшымзаара» инаҵшьны иазгәеиҭеит. «Искандер - зыҧсы ҭоу, уздызхало, уеидызкыло хьӡуп! Уи иргылаз ашәҟәыҩҩцәа рыҩны- идуӡӡоу дунеиуп. Искандер идунеи  иацынхоит ҳавторцәеи иара ҳапремиеи!»,- ҳәа аҳәамҭа ҟаиҵеит иара.

Апремиа анашьара иазку ацеремониа мҩаҧысраны иҟоуп ҧхынҷкәынмза 13 рзы.