Аҟәа. Ԥхынҷкәынмза 1, 2021 шықәса. Аԥсныпресс. Аԥсны аҵарадырреи абызшәатә политикеи Рминистрра Аԥсны ашколқәеи аинтернатқәеи рзы аинвентар аанахәеит. Абри азы Аԥсныпресс ахь адырра ҟаиҵеит Аԥсны аҵарадырреи абызшәатә политикеи Рминистрра ауаажәларра рымадара азы аҟәша аиҳабы Аслан Кәыҭелиа.
«Ҳара иааҳхәеит ашколтә инвентар - 700 цыра апартақәеи 1400 цыра асқамқәеи. Ари актәи аетап ауп. Аминистрра аҩбатәи аетап аҳәаақәа ирҭагӡаны 2022 шықәсазы иара убасҵәҟьа аинвентар аахәара еиҿнакаауеит, убас ала ашколтә инвентар иадҳәалоу апроблема инагӡаны аӡбара алыршахоит», - ҳәа еиҭеиҳәеит Аслан Кәыҭелиа.
Уи иажәақәа рыла, аҵыхәтәаны Аминистрра афонд еиҭарҿыцын 2018 шықәса азы.
«Афонд абар шьҭа хышықәса ҵуеит аиҭарҿыцра амоуижьҭеи. Убри инамаданы Аминистрра аҿы аинвентар ҿыц аахәара азы аӡбамҭа рыдыркылеит. Аԥсны араионқәа зегьы рҟынтәи ашколқәеи аинтернатқәеи азыҳәамҭақәа рхианы Аминистрра ахь иаарышьҭуеит. Ҳара анаҩыс урҭ азыҳәамҭақәа рыла аинвентар аихшара мҩаԥаагалоит. Уажәы аинвентар, инҭкааны иуҳәозар, асқамқәеи апартақәеи аҵарадырреи абызшәатә политикеи Рминистрра ашьҭаҵарҭаҿы ишьҭоуп»,-ҳәа иҳәеит Аслан Кәыҭелиа.
