Аҟәа. Абҵарамза 24, 2021 шықәса. Аҧсныпресс. Аҧсны атуризм аминистр Ҭеимураз Хышба атәыла аҧыза-министр Алеқсандр Анқәаб Москваҟа иусуратә ҭаара алҵшәақәа ртәы изеиҭеиҳәеит.
Аҧсны атуризм аминистрреи Урыстәыла атуризм азы Афедералтә Маҵзуреи рыбжьара аилибакаареи аусеицуреи рзы Амеморандум анапаҵыҩра аҩганктәи аусеицура хра злоу аимпульс анаҭоит, атуристтә маршрутқәа рҳәаақәа арҭбаара иацхраауеит, ҳәа иҧхьаӡоит Алеқсандр Анқәаб.
Аҧснытәи апрофильтә хылаҧшырҭақәа аус рыцурала атуризм Аминистрра раҧхьа иргыланы арахь иаауа аҧсшьаҩцәеи атуристцәеи ршәарҭадареи рыҧсшьаарамҭа ахгаразы иманшәалоу аҭагылазаашьақәа раҧҵареи иадҳәалоу азҵаарақәа ҷыдала ахшыҩзышьҭра анаҭалароуп. Уи аиҳарак, атуристтә хырхарҭақәа рыла иҟоу аконкуренциа ҳасаб азуны аҧснытәи акурортқәа рахь аинтересс аизырҳара иазырхоуп», - ҳәа иазгәеиҭеит Алеқсандр Анқәаб.
Ҭеимураз Хышба иара убас Урыстәылатәи атуризм азы Афедералтә Маҵзура анапхгараҭареи Урыстәыла Аҳәынҭқарратә Дума атуризм азы Акомитет алахәылацәеи рҧылараан амшынтә круизтә маршрут «Аҟәа-Шәача-Геленџьык-Ҟрым» аиҭахацыркра азы алшарақәа ирылацәажәеит ҳәа адырра ҟаиҵеит.
Атуризм аминистр иара убас Урыстәыла Ауаажәларратә Палата аҿы имҩаҧысыз аилатәара атәы еиҭеиҳәеит. Уи иажәақәа рыла араҟа, ахәыҷқәа рыҧсшьараамҭа аиҿкаара азаҵаарақәагьы уахь иналаҵаны, атуризм аусхкы аҿы аус зуа инапхгаратәым аиҿкаарақәа аус рыцура азҵаарақәа ирылацәажәеит.
Аминистрцәа Реилазаара аофициалтә саит аҿы иҟоу адыррақәа рыла, Алеқсандр Анқәаб Ҭеимураз Хышба 2021-шықәсазтәи акурорттә сезон азы аҳасабырба аиқәыршәареи, убри аан иҟоу апроблематә аспектқәа рарбареи рзы анапынҵа ииҭеит.
