Аҟәа. Жьҭаарамза 21, 2021 шықәса. Аԥсныпресс. Жьҭарамза 21 рзы Ҟарачы-Черкессиатәи Ареспублика аул Ԥсыж аҿы Аԥсны Жәлар Реизара-Апарламент Аиҳабы, афилологиатә наукақәа ркандидат Валери Кәарҷиа аԥсуааи абазааи рҭоурыхи рбызшәеи ирызку инаукатә усумҭақәа реизга аӡыргара мҩаԥысит.
Аусмҩаԥгатә рхы аладырхәит Ҟарачы-Черкессиатәи Ареспублика акультура аминистр Зураб Агирбов, ҞЧА Анапхгара аҟны иҟоу агуманитартә ҭҵарақәа Ринститут адиректор Рамазан Тхагапсов, аинститут аусзуҩцәа, аветерантә еиҿкаара, аинтеллигенциа, ауажәларра рхаҭарнакцәа.
Валери Кәарҷия иара убас Ҟарачы-Черкессиатәи Ареспублика Абазатәи амуниципалтә раион Администрациа ахада Руслан Кужев диԥылеит.
Аԥснытәи апарламенттә делегациа иалахәыз Вадим Бжьаниа иҟаиҵаз адыррақәа рыла, Валери Кәарҷиеи Руслан Кужеви реиԥылара аԥхара зҵоу аиҩызаратә ҭагылазаашьаҿы имҩаԥысит.
