Аҟәа. Жьҭаарамза 18, 2021 шықәса. Аԥсныпресс. Атуризм аминистр Теимураз Хышба Москваҟа иусуратә ҭаара аҳәаақәа ирҭагӡаны абгаԥсатә усхкы аиӷьтәра азы ажәалагалақәа реиқәыршәара иазку аусуратә гәыԥ алахәылацәа дырԥылеит.
Ари Афедералтә Агентра «Урыстәыла атуризм» Ауаажәлаарратә хеилак ахаҭарнакцәеи урыстәылатәи абгаԥсаҩцәеи алархәны абгаԥса иазкы имҩаԥысыз раԥхьаӡатәи аусуратә еилатәароуп.
Аусуратә еиԥылара аҳәаақәа ирҭгӡаны ирылацәажәеит 2021 шықәсатәи атуристтә аамҭахәҭа аихшьаалақәеи Урыстәыла атәылауаа Аԥсны рыԥсшьараамҭа азы рыбгаԥса аиҿкаара иадҳәалоу азҵаарақәеи.
Аиԥылара иалахәыз Аԥсны амедицинатә цхыраара аҭара иадҳәалоу азҵаарақәа рзы астатистикатә информациа ала аимдара мҩаԥысит. Урыстәылатәи атуристтә еилазаарақәа ареспублика иаҭаауа атуристцәа ирыднагало абгаԥсатә аалыҵ ҳәа изышьҭоу азарал, аԥхасҭа, мамзаргьы ааха аиураан уи амцхәра аҭара, ахарҭәаара азы абгаԥсатә фонд аҟынтәи азоужьразы иазыԥҵәоу аматериалтә рбзазага ашәагаа иалацәажәеит.
Аиԥылара иалахәыз урыстәылатәи атуристцәа абгаԥсатә еиқәшаҳаҭрақәа реиқәыршәарала аԥсшьара ҳәа иаауа аԥсшьаҩцәа ршәарҭадара аҩаӡара аизырҳара иазкны имҩаԥгатәу ауснагӡатәқәа рзы ажәалагалақәа реиқәыршәара азы еиқәшаҳаҭхеит.
Абгаԥстә усура аиӷьтәразы аусуратә гәыԥ Аԥсныҟа аԥсшьара ҳәа иаауа аҳәаанырцәтәи атәылауааи атәылауаҩра змам ахаҿқәеи амашәыр аҟынтәи ихымԥадатәиу рыбгаԥсеи, иара убас атранспорттә хархәагақәа рыла иаауа аҳәаанырцәтәи аиуристтәии хазхаҭалатәии атәылауаа ртәылауаҩратә ҭакԥхықәра ихымԥадатәиу абгаԥсеи рыҿиара хықәкыс иҟаҵаны Аҳәынҭқарра Ахада Аслан Бжьаниа Иусԥҟа ала иаԥҵан.
