Аҟәа. Жәабранмза 16, 2022 шықәса. Аԥсныпресс. Москва ақалақь аҿы имҩаԥысит Аԥсны адәныҟатәи аусқәа рминистр Инал Арӡынбеи ателеканал «Russia Today» аредактор хада, Жәларбжьаратәи Аинформациатә Маҵзура «Россия сегодня», аинформациатә агентра «Sputnik» аредактор хада Маргарита Симониани реиԥылара.
Аиԥылара аҿы излацәажәаз азҵаара хадақәа иреиуоуп ааигәа имҩаԥысраны иҟоу Аԥсны адәныҟатәи аусқәа Рминистрра иатәу афункциарацәа назыгӡо Амедиацентр аартра. Ахәҭакахьала, Амедиацентри Урыстәылатәи Афедерациа иԥхьагылоу аинформациатә маҵзурақәеи русеицура ашьақәгылареи аҿиареи рзы аинструментқәа ирыхәаԥшит.
Иара убас Аԥсны Аҳәынҭқарра хра злоу аимиџь ашьақәгылареи жәларбжьаратәи аинформациатә политика арӷәӷәареи ирыдҳәалоу азҵаарақәа жәпакы ирылацәажәеит.
Аԥсны Аҳәынҭқарра адәныҟатәи аусқәа Рминистрра аҟны иҟоу афункциарацәа назыгӡо Амедиацентр аартра азԥхьагәаҭоуп ааԥынра алагамҭа 2022 шықәсазы. Амедиацентр аус аулоит Урыстәылатәи Афедерациа адәныҟатәи аусқәа Рминистрра аинформациеи акьыԥхьи Рдепартаменти, иара убас Урыстәылатәи Афедерациа аинформациатә маҵзурақәеи рыцхыраарала.
