Аҟәа. Жәабранмза 11, 2022 шықәса. Аԥсныпресс. Жәабранмза 10 рзы Приднестровтәи Молдавтәи Ареспублика аҟны иҟоу аҷыдалкаатә зинмчы змоу Аԥсны ахаҭарнак Алеқсандр Ватамани Приднестровтәи Молдавтәи Ареспублика аҟны иҟоу аҷыдалкаатә зинмчы змоу Аахыҵ Уаԥстәылатәи Ареспублика ахаҭарнак Витали Ианковскии, Приднестровтәи Молдавтәи Ареспублика Иреиҳаӡоу Ахеилак ахантәаҩы Александр Коршунови реиԥылара мҩаԥысит. Аиԥылара иара убас ихы алаирхәит Приднестровтәи Молдавтәи Ареспублика Иреиҳаӡоу Ахеилак ахантәаҩы адәныҟатәи аполитика азы иабжьгаҩ Сергеи Широков.
Аиԥылара аҳәаақәа ирҭагӡаны аганқәа ганрацәалатәи аформат ала аусеицура аҭагылазаашьеи аперспективақәеи ирылацәажәеит.
Приднестровиатәи Апарламенти Аԥсни Аахыҵ Уаԥстәылеи Рофициалтә Хаҭарнакрақәеи русеицура аҳәаақәа рырҭбаареи адиалог амҩаԥгареи рзы аинтерес шыҟоу аарԥшын.
Иара убри аҽныҵәҟьа Приднестровтәи Молдавтәи Ареспублика Иреиҳаӡоу Ахеилак аҿы Алеқсандр Ватамани Приднестровтәи Молдавтәи Ареспублика Иреиҳаӡоу Ахеилак ахантәаҩы ихаҭыԥуаҩ, азакәанԥҵара, азинхьчаратә усбарҭақәа, атәылахьчара, ашәарҭадара, абжьаҟазаратә усура, атәылауаа рхақәиҭреи рзинқәеи рыхьчара рзы Приднестровтәи Молдавтәи Ареспублика Иреиҳаӡоу Ахеилак акомитет ахантәаҩы Галина Антиуфеева реиԥылара мҩаԥысит.
Аиԥылара аҿы адепутаттә корпус алахәхарала аганқәа реимадара аконтекст аҿы аԥсуа-приднестровтәи аусеицура иазку актуалра злоу азҵаарақәа жәпакы рзы ргәаанагарақәа еибырҳәеит.
