«Иҟаҳҵо зегьы, ҳзынио зегьы, ибзиоу аума, ацәгьара аума, зегьы ҳара ҳауп знапы иаку, уи аӡәгьы ихараны иҟам. Ари агәҭакы еилыкка иаанаԥшраны иҟоуп аспектакль «Аҽацә лас», - ҳәа ихатәы идеиа адгалара мҩаԥго иазгәеиҭеит арежиссиор-ақәыргылаҩ Адгәыр Ақаҩба.
Уи ишазгәеиҭаз ала, аспектакль аԥсуа милаҭтә драматә театр аԥҵаразы аҭоурых аҿы раԥхьатәи аҽазышәара иазкхоит. Рыцҳарас иҟалаз, уи трагедиала ихыркәшахеит.
Аспектакль асахьаҭыхыҩ ақәыргылаҩ - Баҭал Џьопуа. Апиеса аԥсуа бызшәахьы еиҭеигеит ашәҟәыҩҩы Даур Наҷҟьебиа.
Аилацәажәара рхы аладырхәит атеатр ацехқәа зегьы рхаҭарнакцәа. Арежиссиор ақәыргылаҩи асценографи рсахьаркыратә гәҭакы анагӡара иадҳәалаз азҵаарақәа жәпакы ирылацәажәеит.