Аелектронтә напынҵа алагалара азы, уи иажәақәа рыла, ацифратә напынҵа азы Аԥсны азакәанԥҵара инақәыршәаны анорма-зинтә шәҟәынҵақәа рыдкылара ахәҭоуп. Ақәҵара адкылара ашьҭахь анаҩстәи етапны иҟалоит уи азы азинмчы змоу аусбарҭа ала анорма-зинтә шәҟәынҵақәа рыдкылара. Владимир Делба иажәақәа рыла, иааиуа ашықәс азы иарбоу алагала инарҭбааны ахархәара аиуеит.
«Ари аусшәҟәқәа реиқәыршәареи адыррақәа рыла аимадареи иадҳәалоу апроцесс акыр иармариароуп. Аелектронтә напынҵа ала аелектронтә усшәҟәқәа рырҵабыргра азы алшара ҟалоит, уи абиуџьеттә харџьқәа рыхәҭак реиҵатәразы алшара аԥнаҵоит», - ҳәа алкаа ҟаиҵеит атәыла афинансқәа Рминистрра ахада.
Апроект атехникатә дгылара анаҭоит Аԥсны Аҳәынҭқарра анапхгаратә еимадара азы Амаҵзура. Аԥыза-министр Алеқсандр Анқәаб ари алагала ҿыц иаҵоу аҵакы ахадара инаҵшьны иазгәеиҭеит. «Аамҭа ҳҽақәыршәаны ҳцалароуп. Да мҩакгьы ыҟаӡам»,- ҳәа иҳәеит Алеқсандр Анқәаб.