Аҟәа. Жьҭарамза 7, 2021 шықәса. Аԥсныпресс. Ауаажәларратә еиҿкаарақәа 19 еидызкыло Аԥсны иҟоу аурыс еицтәылауаа реиҿкаара Акоординациатә Еидгылара II Аконференциа мҩаԥысит.
2020 – 2021шш. рзы имҩаԥгаз аусура аихшьаалақәеи 2022-2023шш. аусура азԥхьагәаҭарақәеи ирызкыз Аконференциа мҩаԥысит Аҟәа ақалақь иҟоу Москватәи акультура-усуратә центр «Москва Аҩны» аҿы. Убри аан ари аусмҩаԥгатә аиҿкаареи амҩаԥгареи рҿы адгылара ҟанаҵеит Аԥсны иҟоу Урыстәылатәи Афедерациа Ацҳаражәҳәарҭеи ареспубликеи Москватәи акультура-усуратә ценр «Москва Аҩны» иҟоу Урыстәыла аус ацура Ахаҭарнакреи.
Аконференциа рхы аладырхәит аусрыс еицтәылауаа еидызкыло 22 еиҿкаара аделегатцәеи асасцәеи. Асасцәа рхыԥхьаӡараҿы иҟан Урыстәыла Ацҳаражәҳәарҭа абжьгаҩ-цҳаражәҳәаҩ Максим Литвинов, Урыстәыла аус ацура Ахаҭарнакра анапхгаҩы инапынҵақәа назыгӡо Михаил Масаев, Аԥсны Аҳәынҭқарра ашәарҭадара Ахеилак Амаӡаныҟәгаҩ Сергеи Шамба, Аԥсны аԥыза-министр ихаҭыԥуаҩ Сергеи Пустовалов.
Аконференциа аартуа, Аԥсны иҟоу аурыс еицтәылауаа реиҿкаара Акоординациатә Еидгылара ахантәаҩы Олег Иурченко, аицтәылауаа реидкылара Аидгылара ахықәкы хаданы иҟоуп ҳәа иазгәеиҭеит, анаҩс уи Акоординациатә Еидгылара шықәсык иалагӡаны инанагӡаз аусура азы ажәахә ҟаиҵеит. Иажәахә аҿы уи дырзааҭгылеит апандемиа аамҭахәҭа аан акыр ишыуадаҩызгьы, аха уеизгьы имҩаԥгаз еиуеиԥшым ахырхарҭақәа змаз 56 инарзынаԥшуа аусмҩаԥгатәқәа.
Аԥсны Аҳәынҭқарра ашәарҭадара Ахеилак Ахантәаҩы Сергеи Шамба аконференциа иалахәыз зегьы бзиала шәаабеит ҳәа раҳәо Аҳәынҭқарра Ахада Аслан Бжьаниа ихьӡала адныҳәаларатә цҳамҭа даԥхьеит. Адныҳәаларатә цҳамҭа аҿы ахәҭакахьала иазгәаҭан «Аԥсны иҟоу аурыс уаажәларра ҳара ҳуаажәларра иузаҟәымҭхо иалоуп, ҳара зеиԥш уснагӡатәны ҳҿаԥхьа иагьықәгылоуп – амилаҭтә гәыԥқәа зегьы рыбжьара еинааланы, ҳәоуеиқәшәарыла иҿио аизыҟазаашьақәа раԥҵара».
Убри аамышьҭахь апресс-маҵзура, изиндырратәи агранттәи аҟәшақәа рнапхгаҩцәа, иара убас аҳамҭақәа ранашьареи азинтә хьчареи рыҟәша анапхгаҩи Аԥсны иҟоу аурыс еицтәылауаа реиҿкаара Акоординациатә Еидгылара аҿы 2020-2021 шықәсқәа ирҭагӡаны инарыгӡаз аусура аҳасабырба ҟарҵеит, убри аан урҭ русура аҿы ауадаҩрақәа шыҟоугьы уи хра злоу адинамика шаныԥшуа азгәарҭеит, иҟоу апроблемақәа рыӡбаразы ажәалагалақәагьы ҟарҵеит.
Убри аамышьҭахь Аԥсны иҟоу аурыс еицтәылауаа реиҿкаара Акоординациатә Еидгылара ахантәаҩы, уи ихаҭыԥуаҩцәа, иара убас Аԥсны иҟоу аурыс еицтәылауаа реиҿкаара Акоординациатә Еидгылара Арегионалтә Координациатә Хеилак аҿы ахаҭарнак ралхра мҩаԥысит.
Аԥсны иҟоу аурыс еицтәылауаа реиҿкаара Акоординациатә Еидгылара ахантәаҩыс ҩаԥхьа деиҭалырхит Олег Иурченко, уи ихаҭыԥуаҩцәас - Елена Жилинскаиа, Геннади Кожухарь, Наталиа Семионова, Анна Калиагина.
Аԥсны иҟоу аурыс еицтәылауаа реиҿкаара Акоординациатә Еидгылара Арегионалтә Координациатә Хеилак аҿы ахаҭарнакс далхуп Наталиа Каиун.
Аԥсны иҟоу аурыс еицтәылауаа реиҿкаара Акоординациатә Еидгылара х-еиҿкаарак алалеит - акультуратә фонд «Платформа», ауаажәларратә еиҿкаара «Русский дом», аҿартә уаажәларратә еиҿкаара «Фениксы».
Аконференциа амҩаԥгара аихшьаалақәа рыла арезолиуциа рыдыркылеит ҳәа адырра ҟанаҵоит Аԥсны иҟоу аурыс еицтәылауаа реиҿкаара Акоординациатә Еидгылара апресс-маҵзура.
