Print this page
АЖӘАБЖЬҚӘА

АЛЕҚСАНДР АНҚӘАБ АПАССАЏЬЫРЦӘА РЫИАГАРЕИ АМАШЬЫНА ЛАСҚӘА РЫЛА АԤСНИ УРЫСТӘЫЛЕИ ИРЫБЖЬОУ АҲӘЫНҬҚАРРАТӘ ҲӘАА АХЫСРЕИ ИРЫДҲӘАЛОУ АЗҴААРАҚӘА РЗЫ АУСУРАТӘ ЕИЛАТӘАРА МҨАԤИГЕИТ.

Аԥшьаша, 26 Лаҵара 2022 20:29 94
АЛЕҚСАНДР АНҚӘАБ АПАССАЏЬЫРЦӘА РЫИАГАРЕИ АМАШЬЫНА ЛАСҚӘА РЫЛА АԤСНИ УРЫСТӘЫЛЕИ ИРЫБЖЬОУ АҲӘЫНҬҚАРРАТӘ ҲӘАА АХЫСРЕИ ИРЫДҲӘАЛОУ АЗҴААРАҚӘА РЗЫ АУСУРАТӘ ЕИЛАТӘАРА МҨАԤИГЕИТ.

Аҟәа. Лаҵарамза 26, 2022 шықәса. Аԥсныпресс. Апассаџьырцәа рыиагареи амашьына ласқәа рыла Аԥсни Урыстәылеи ирыбжьоу аҳәынҭқарратә ҳәаа ахысреи ирызку аусуратә еилатәара  мҩаԥигеит аԥыза-министр Алеқсандр Анқәаб, ҳәа Аԥсныпресс ахь адырра ҟарҵеит аминистрцәа Реилазаара апресс-маҵзура аҿы.  

Ҳазҭоу ашықәса лаҵарамза инаркны Аҳазылхратә Ԥыԥшырҭа «Адлер-автомҩатә» аҿы урыстәылатәи аҳазылхырҭа аԥснытәи автомашьынарныҟәцаҩцәа рахь, аиуристтә хаҿқәагьы уахь иналаҵаны, апассаџьырцәеи аидарақәеи рыиагара инамаданы иназыцҵоу адҵақәа ықәдыргыло иалагеит. 

Аилатәара аҿы аҿыц лагалақәа иаҵанамкуа автомашьынарныҟәцаҩцәа ркатегориақәа ирылацәажәеит.

Аԥыза-министр ихаҭыԥуаҩ, аекономика аминистр Кристина Озган ицәырҵыз азҵаара аҭышәынтәалара азы Урыстәыла Афедералтә Ҳазылхратә Маҵзуреи атранспорт Аминистрреи рақәыршаҳаҭра азы имҩаԥгахо ауснагӡатәқәа рзы адырра ҟалҵеит.

Аҩ-ҳәынҭқаррак рыбжьара жәларбжьаратәи аиагарақәа иашьашәалоу анапхгарабжьаратәи аиқәшаҳаҭра рыла иахьҳәаақәҵахо, насгьы иҿыцу алагалақәа жәларбжьаратәи аиагара мҩаԥызго аҳәаа ианахысуа ауадаҩрақәа ахьрызцәырнаго инамаданы, атәыла аԥыза-министр  аамҭа кьаҿ иалагӡаны урыстәылатәи аган азинмчы змоу аусбарҭақәа рҿы аилацәажәарақәеи аконсультациақәеи рымҩаԥгара азы адҵа ҟаиҵеит.

Аилатәара рхы аладырхәит аԥыза-министр ихаҭыԥуаҩ, аекономика аминистр Кристина Озган, Аҳәынҭқарратә ҳазылхратә Еилкы ахантәаҩы Оҭар Хьециа, Аԥсны иҟоу Урыстәыла Афедералтә ҳазылхратә Маҵзура ахаҭарнак   Константин Козлов.