Аҟәа. Жәабранмза 1, 2022 шықәса. Аԥсныпресс. Иахьа Москва ақалақь, Урыстәылатәи Афедерациа аенергетика Аминистрра аҿы имҩаԥысит Аԥсны аԥыза-министр ихаҭыԥуаҩ, аекономика аминистр Кристина Озгани Урыстәылатәи Афедерациа аенергетика аминистр ихаҭыԥуаҩ Евгени Грабчаки реиԥылара.
Аԥсны аекономика Аминистрра апресс-маҵзура излаанацҳауа ала, аиԥылара аҿы аганқәа аенергетикатә усхкы иадҳәалоу акыр зҵазкуа азҵаарақәа ирылацәажәеит:
Аԥсны Аҳәынҭқарра ауааԥсыра еиԥырҟьамкәа афымцамч ала реиқәыршәара алыршара азы Урыстәылантәи афымцамч аашьҭра аиҿкаара;
2022 шықәсазы Аҟәа ақалақь аҿы ахархәара зауа афымцамч акоммерциатә ҳасабырбара азы априборқәа рышьақәыргылара апрограмма;
Зыыԥшра ҟамҵакәа зеиҭашьақәыргылара аҭаху аобиектқәа рреконструкциа азԥхьагәазҭо аенергетикатә инфраструктура апрограмма амодернизациа амҩаԥгара.