Аҟәа. Жьҭаарамза 25, 2021 шықәса. Аԥсныпресс. Акаратеномичи азы Аԥсны еизгоу акоманда Москва ақалақь аҿы имҩаԥысыз аинрал-маиор Геннади Заицев ихьӡ зху аицлабрақәа "Аиааира агареи ахынҳәреи» рҿы 8 медалк ранашьахеит.
Аицлабрақәа Москва ақалақь аҿы жьҭаарамза 24 рзы имҩаԥысуан.
Аԥсны аспорт азы аҳәынҭқарратә Еилакы апресс-маҵзура иҟанаҵо адыррақәа рыла, акаратеномичи азы аиааира игеит, 75 кьыла рҟынӡа иҟоу акапантә категориа иаҵанакуа рыбжьара аспарринг (Себу иппон кумитэ) аҿы актәи аҭыԥ ааникылеит Геннади Ҵулаиа.
Аҩбатәи аҭыԥ ааникылеит 75+ ҳәа акапантә категориа иаҵанакуа рыбжьара иқәгылоз Смел Саӡба.
Аԥснытәи аспортсменцәа акарате еиуеиԥшым ахкқәа рҿы иқәгылон: Иахара ката, ката каратеномичи, ката Шотокан, тамесивари, кумите Шотокан.
Иарбоу ахырхарҭақәа рыла аспортсменцәа иааныркылеит аҩбатәии ахԥатәии аҭыԥқәа.
Аихшьаалатә зшьа аҿы Геннади Ҵулаиа 5 медалк раиура иҽаԥсаитәит (ахьтәы медалк (1), араӡны медалқәа -2, аџьаз медалқәа - 2), Смел Саӡба иакәзар – 3 медалк ианашьахеит (араӡны медал -1, аџьаз медалқәа- 2) .
Аԥсны еизгоу акоманда напхгара аиҭон акаратеномичи азы жәларбжьаратәи акласс иаҵанакуа аспорт азҟаза, Аԥсны акаратеномичи Афедерациа Апрезидент Ҭемыр Ҵулаиа.
