Аҟәа. Лаҵарамза 24, 2022 шықәса. Аԥсныпресс. Аԥсны Жәлар Реизара-Апарламент афбатәи ааԥхьара (2017 – 2022 шш.) Аиҳабы ихаҭыԥуаҩ Михаил Сангәылиа Аԥсны Аҳәынҭқарра Ауаажәларратә Палата алахәылас далырхит. Михаил Сангәылиа икандидатура азы рыбжьы рҭиит Ауаажәларратә Палата 18-ҩык алахәылацәа.
Аиҭалхрақәа Ауаажәларратә Палата алахәыларахь ҩыџьа акандидатцәа лаҵарамза 20, 2022 шықәсазы имҩаԥгаз алхрақәа рҿы еиҟараны абжьқәа ахьроуз инамаданы имҩаԥысит.
Убас ала, лаҵарамза 20, 24 рзы имҩаԥысыз алхрақәа реихшьаалақәа рыла Ауаажәларратә Палата аилазаарахь иалхын Ахба Асҭамыр Иаков-иԥа, уи икандидатура адгалара мҩаԥнагеит ареспубликатә уаажәларратә еиҿкаара «Аԥсадгьыл», иара убас Сангәылиа Михаил Пиотр-иԥа – Ареспубликатә Уаажәларратә Еиҿкаара «Аԥсны жәлар Реиҿкара».
Ауаажәларратә Палата алахәылас алхразы аконкурстә лыԥшаара ахь еиуеиԥшым аполитикатәи ауаажәларратәи еиҿкаарақәа рҟынтәи арзаҳалқәа 9 алаҵан.
Ауаажәларратә Палата ахь ҽҳәараанӡа алхрақәа мҩаԥган Ерик Рштуни Аԥсны Жәлар Реизара-Апарламент адепутатс иалхреи Надежда Венедиктова лхатәгәаԥхарала Ауаажәларратә Палата аилазаара дахьалҵызи инамаданы.
