Аҟәа. Лаҵарамза 18, 2022 шықәса. Аԥсныпресс. Аԥсны иҷыдоу аҭагылазаашьақәа рминистр Лев Кәыҵниа атәыла аԥыза-министр Алеқсандр Анқәаб иара напхгара зиҭо Ахылаԥшырҭа аусура азы адырра ииҭеит, ҳәа иаанацҳауеит аминистрцәа Реилазаара апресс-маҵзура.
Аусуратә еиԥылара аҿы Иҷыдоу аҭагылазаашьақәа рзы Аминистрра аматериал-техникатә еиқәыршәара азҵаарақәа ирылацәажәеит, иара убас арегионалтә ҟәшеиҵақәа рыҿиара, Донецктәи Жәлартә Республикеи Лугансктәи Жәлартә Республикеи рҟынтәи рколлегацәеи дареи агуманитартә усура аганахьала аусеицура азҵаара иазааҭгылеит.
Аԥыза-министр Иҷыдоу аҭагылазаашьақәа рминистр ахшыҩзышьҭра аиҭарц иҳәеит иааиуа акурорттә сезон аҽазыҟаҵара.
«Ареспублика Иҷыдоу аҭагылазаашьақәа Рминистрра атуристтә маршрутқәа зегьы рыҟны аԥсшьаҩцәа ршәарҭадара аиқәыршәара ҷыдала ахшыҩзышьҭра анаҭалароуп», - ҳәа иҳәеит Алеқсандр Анқәаб.
