Аҟәа. Лаҵарамза 17, 2022 шықәса. Аԥсныпресс. Аҧсны Аҳәынҭқарра Ахада Аслан Бжьаниа Аԥсны Аҳәынҭқарра адәныҟатәи аусқәа Рминистрра аҧҵоижьҭеи 29 шықәса аҵра инамаданы адныҳәалара ҟаиҵеит.
Адныҳәалараҿы иҳәоуп:
«Ҳаҭыр зқәу Аԥсны Аҳәынҭқарра адәныҟатәи аусқәа Рминистрра аусзуҩцәа, аветеранцәа!
Ишәыдысныҳәалоит Аԥсны Аҳәынҭқарра адәныҟатәи аусқәа Рминистрра аԥҵоижьҭеи 29 шықәса аҵра амш. Аҧсны Аҳәынҭқарра адәныҟаполитикатә маҵзура ҳмилаҭтә интересқәа рыхьчареи рымҩаԥгареи алнаршоит, Ареспублика жәларбжьаратәи аимадарақәа рымҽхак арҭбаауеит, иаӡбоит атәылазы акрызҵазкуа егьырҭ азҵаарақәа.
Ҳара ҳдипломатцәа есқьынгьы рнапы иану ауснагӡатәқәа ҭакҧхықәрала иазнеиуан, иахьагьы урҭ қәҿиарала рынагӡара иаҿуп. Абри инамаданы, ҷыдала иазгәасҭарц сҭахуп Аԥсны Аҳәынҭқарра адәныҟатәи аусқәа Рминистрра аҧҵара аҧхьатәи ашықәсқәа раан амаҵ азызуаз, адәныҟаполитикатә маҵзура аветеранцәа. Ҳара ибзианы иаҳдыруеит Аҧсны Аџьынџьтәылатә еибашьра ашықәсқәа рзы иаҧҵаз Аминистрра аусура анымҩаҧысуаз иҟаз аҭагылазаашьа шыуадаҩыз. Ҳәарада, ҳдипломатиа иамоу аихьӡарақәа ҳҳәынҭқарра ашьақәгылареи ашьақәырҕәҕәареи иузаҟәымҭхо иадҳәалоуп.
Ҳаҭыр зқәу аҩызцәа, иалшәыршаз аихьӡарақәа ирыцҵо, ишәзеиҕьасшьоит адәныҟаполитикатә усбарҭа аусура арҕәҕәара, жәларбжьаратәи азхаҵара амҽхак арҭбаара, ҳпартниорцәеи ҳареи лыҵшәазмоу ҳусеицура аихаҳара.
Сара агәра згоит адәныҟатәи аусқәа Рминистрра аколлектив ҳҳәынҭқарра аизҳазыҕьаразы анапы иану аусқәа ҭакҧхықәрала ишынанагӡо. Аринахысгьы ишәзеиҕьасшьоит ақәҿиарақәа!»
Источник: https://apsnypress.info/ru/item/7874-aslan-bzhaniya-nashi-diplomaty-vsegda-dostojno-vypolnyali-i-vypolnyayut-vozlozhennye-na-nikh-otvetstvennye-zadachi
© АПСНЫПРЕСС.
